തൃശൂര്‍: പഴയ ഓര്‍മകളും കളിതമാശകളും അധ്യാപകരോടുള്ള സ്‌നേഹാദരങ്ങളുമായി സഹപാഠികള്‍ 52 വര്‍ഷത്തിനുശേഷം വിദ്യാലയത്തില്‍ ഒത്തുകൂടി.
സെന്റ് തോമസ് കോളജ് ഹയര്‍ സെക്കന്‍ഡറി സ്‌കൂളിലെ 1972- 73 എസ്എസ്എല്‍സി ബാച്ചിലെ വിദ്യാര്‍ത്ഥികളാണ് പഴയ ക്ലാസ് മുറിയിലും പ്രിന്‍സിപ്പലിന്റെ ഓഫീസിലുമായി ഒത്തുകൂടിയത്. അധ്യാപകരായിരുന്ന ലോനപ്പന്‍ മാഷ്, ജോസ് മാഷ്, ജോസഫ് മാഷ്, ഇപ്പോഴത്തെ പ്രിന്‍സിപ്പല്‍ ജോസഫ് ആന്റണി എന്നിവരെ പൊന്നാടയണിയിച്ച് ആദരിച്ചു. കേയ്ക്കു മുറിച്ചു മധുരം പങ്കുവച്ചു. വേര്‍പിരിഞ്ഞ സഹപാഠികളെ അനുസ്മരിച്ചു.
റിട്ടയേഡ് ചീഫ് എന്‍ജിനിയര്‍ ജോസ് പുതുക്കാടന്‍, ഫ്രാന്‍സിസ് ആലുക്ക, ജോണി പടിക്കല, ചാര്‍ളി പന്തല്ലൂക്കാരന്‍, സി.ജെ. ജോണ്‍, ജോയ് തോട്ടാന്‍ തുടങ്ങിയവര്‍ സംസാരിച്ചു.
ലോക പുരുഷദിനത്തിലാണ് പൂര്‍വ വിദ്യാര്‍ത്ഥി സംഗമം ഒരുക്കിയത്. സ്‌കൂള്‍ കാമ്പസില്‍നിന്ന് പഴയ ഉല്ലാസയാത്രയുടെ ഓര്‍മകളുമായി അവര്‍ ഉല്ലാസയാത്രയും നടത്തി. വീരസ്യങ്ങള്‍ വിളമ്പിയും പരസ്പരം കുമ്പസാരിച്ചും പാട്ടുപാടിയുമെല്ലാം പുനസമാഗമം ആഘോഷമാക്കി.
