ദുബായ്: മലബാർ പ്രവാസി(യു എ ഇ) കമ്മറ്റിയുടെ ആഭിമുഖ്യത്തിൽ കേരള സർക്കാർ പ്രവാസികൾക്കായി പുതുതായി നടപ്പിലാക്കുന്ന നോർക്ക കെയർ ഇൻഷുറൻസ് ബോധവത്കരണവും രജിസ്‌ട്രേഷനും, സംഘടിപ്പിച്ചു. നോർക്ക പ്രവാസി അംഗത്വ രജിസ്‌ട്രേഷനും, പ്രവാസി ക്ഷേമ നിധി, പ്രവാസി പെൻഷൻ എന്നിവയെകുറിച്ചുള്ള മുഖാമുഖവും ഇതോടൊപ്പം നടന്നു. ഓർമ സാംസ്കാരിക സംഘടനയുമായി
സഹകരിച്ചാണ് പരിപാടി സംഘടിപ്പിച്ചത്.
പരിപാടിയുടെ ഉദ്‌ഘാടനം അംഗങ്ങളുടെ ഓൺലൈൻ രജിസ്ട്രേഷന് തുടക്കമിട്ടു കൊണ്ട് അഡ്വ.മുഹമ്മദ് സാജിദ് നിർവഹിച്ചു.
തുച്ഛ വരുമാനക്കാരും, ഇൻഷുറൻസ് പരിരക്ഷ ഇല്ലാത്തവരുമായ സാധാരണ പ്രവാസികൾക്കും കുടുംബത്തിനും താങ്ങാവുന്ന ഏറെ പ്രയോജനപ്രദവും, ബ്രിഹത്തായ ആരോഗ്യ പരിരക്ഷ ലഭിക്കുന്നതുമായ ഒരു പദ്ധതിയാണ്
നോർക്ക കെയർ ഇൻഷുറൻസ് പദ്ധതിയെന്നും, അർഹരായ എല്ലാ പ്രവാസികളും ഈ അവസരം വിനിയോഗിക്കണം എന്നും അഡ്വ.മുഹമ്മദ് സാജിദ് അഭിപ്രായപ്പെട്ടു. ഇതിൽ അംഗങ്ങളാകുന്നവർക്കും ഭാര്യ ,രണ്ടു കുട്ടികൾ എന്നിവർക്കും അഞ്ചു ലക്ഷം രൂപയുടെ ആരോഗ്യ പരിരക്ഷ ഈ പദ്ധതി ഉറപ്പു നൽകുന്നു.
നോർക പ്രതിനിധികളായി പങ്കെടുത്ത ബിജു വാസുദേവൻ, മിഥുൻ എന്നിവർ പദ്ധതികളെക്കുറിച്ചു വിശദീകരിച്ചു. അംഗങ്ങളുടെ സംശയങ്ങൾക്ക് മറുപടിയും നൽകി.
കേരള സർക്കാർ നോർക്ക മുഖാന്തിരം നടപ്പിലാക്കുന്ന വിവിധ പദ്ധതികളിൽ പ്രധാനമായും രണ്ട് പദ്ധതികളാണ് പ്രവാസി നോർക്ക കാർഡും പ്രവാസി ഇൻഷുറൻസും. ഇതോടൊപ്പം പ്രവാസി ക്ഷേമ നിധിയുടെ കീഴിൽ പ്രവാസി
പെൻഷൻ പദ്ധതിയും നിലവിലുണ്ട്. യു എ ഇ യിലെ പ്രവാസി കേരളീയർക്ക് ഈ പദ്ധതികളുടെ പ്രാധാന്യവും സാധ്യതകളും അറിയാനും , അംഗങ്ങളായി ചേരാനും മറ്റു സഹായങ്ങൾക്കും 0559284130 എന്ന നമ്പറിൽ ബന്ധപ്പെടാവുന്നതാണെന്ന് അവർ അറിയിച്ചു.
പ്രവാസി ഇൻഷുറൻസ് പദ്ധതിയിലേക്കുള്ള രജിസ്‌ട്രേഷൻ ഈ മാസം 31 നു അവസാനിക്കയാണ്. കേരളപ്പിറവി ദിനമായ നവംബർ 1 മുതൽ ഇൻഷുറൻസ് പദ്ധതി നിലവിൽ വരും.
ചടങ്ങിൽ മലബാർ പ്രവാസി വൈസ് പ്രസിഡണ്ട് മൊയ്‌ദു കുട്ട്യാടി അധ്യക്ഷത വഹിച്ചു.
മുരളി കൃഷ്ണ, സകരിയ പോൾ , ഷൈജ , ഷഫീഖ് , നബീൽ തുടങ്ങിയവർ സംസാരിച്ചു.
സിക്രട്ടറി ശങ്കർ നാരായൺ സ്വാഗതവും, നൗഷാദ് നടുക്കളത്തിൽ നന്ദിയും പറഞ്ഞു.
