ദുബായ്: നാം ഇന്ന് ദാരിദ്ര്യത്തെക്കുറിച്ചും അതിദാരിദ്ര്യത്തെക്കുറിച്ചും ചർച്ച ചെയ്യുമ്പോൾ , നമ്മുടെ നാടിൻ്റെ ദാരിദ്ര്യം മാറ്റിയതിനു പിന്നിൽ ഇപ്പോഴും, അതിനുമുമ്പുമുണ്ടായിട്ടുള്ള പ്രവാസികളുടെ പങ്ക് നിസ്തുലമാണെന്ന് ഷാഫി പറമ്പിൽ എംപി പറഞ്ഞു. യു എ ഇയിൽ പ്രവർത്തിക്കുന്ന പ്രമുഖ കൂട്ടായ്മയായ ദുബായ് വടകര എൻ ആർ ഐ യുടെ ഇരുപത്തിമൂന്നാം വാർഷിക പരിപാടി "പ്രവാസോത്സവം 2025" ദുബായ് ക്രസ്ൻ്റ് സ്കൂൾ മൈതാനിയിൽ ഉദ്ഘാടനം ചെയ്യ്തു സംസാരിക്കുകയായിരുന്നു അദ്ദേഹം.
ഗൾഫ് രാജ്യങ്ങളിൽ മുഴുവൻ നിറയെ മലയാളികളാണ്. എന്നാൽ ആ മലയാളികൾക്കിടയിൽ വലിയൊരു ശതമാനം വടകരക്കാരാണെന്ന് തനിക്ക് നേരിട്ട് അറിയാൻ കഴിഞ്ഞിട്ടുണ്ട്. എല്ലാ വ്യത്യാസങ്ങളെയും മറന്നുകൊണ്ട് ഒരുമയുടെയും നന്മയുടെയും അടയാളമായവരാണ് പ്രവാസി സാമൂഹമെന്നും അദ്ദേഹം പറഞ്ഞു. നാടിൻ്റെ അഭിവൃദ്ധിക്ക് വേണ്ടി പ്രവാസികൾ നൽകിയോളം സംഭാവന ഇന്നുവരെ മറ്റാർക്കും നൽകാൻ കഴിഞ്ഞിട്ടില്ല എന്നും അദ്ദേഹം കൂട്ടിച്ചേർത്തു.
താൻ പാർലമെൻ്റിൽ എത്തിയപ്പോൾ ആദ്യമായി ഉന്നയിച്ചത് പ്രവാസികളുടെ യാത്ര പ്രശ്നവുമായി ബന്ധപ്പെട്ട വിഷയമായിരുന്നു. ആ വിഷയം അന്നത്തോടെ അവസാനിപ്പിച്ചു എന്ന് കരുതരുത്. ഇപ്പോഴും ക്രിയാത്മകമായും ശാശ്വതമായും പരിഹാരം കാണാനുള്ള ശ്രമം ജനപ്രതിനിധി എന്ന നിലയിൽ ഞാൻ തുടർന്നുകൊണ്ടിരിക്കുകയാണെന്നും അദ്ദേഹം ഉറപ്പു നൽകി.
വടകര എൻ ആർ ഐ ദുബായ് പ്രസിഡണ്ട് ഇക്ബാൽ ചെക്യാട് അധ്യക്ഷത വഹിച്ചു.ദുബായ് ഇന്ത്യൻ കോൺസുലേറ്റിലെ കോൺസൽ ( പാസ്പോർട്ട്‌) സുനിൽ കുമാർ മുഖ്യഥിതി ആയിരുന്നു.
പ്രവാസോത്സവ കമ്മിറ്റി ചെയർമാൻ കെ പി മുഹമ്മദ്, കൺവീനർ പുഷ്പജൻ, സ്ഥാപകാംഗം ഇന്ദ്ര തയ്യിൽ,രക്ഷാധികാരി അഡ്വ:സാജിദ് അബൂബക്കർ, ഷിനോജ് രാജൻ (എം ഡി, ഗേഞ്ചസ് ഷിപ്പിങ് ), റിജാസ് റഹ്മാൻ (എം ഡി, അൽവർസ്റ്റോൺ ഗ്രൂപ്പ്‌), എന്നിവർ ചടങ്ങിൽ സംസാരിച്ചു.
സിക്രട്ടറി രമൽ നാരായണൻ സ്വാഗതവും, ട്രഷറർ മുഹമ്മദ് ഏറാമല നന്ദിയും പറഞ്ഞു.ഈ വർഷത്തെ കടത്തനാട് ബിസിനസ്‌ എക്സ്‌ലൻസ് അവാർഡ് ജേതാവ് ടി എൻ അഷ്‌റഫ്‌, കടത്തനാട് വനിതാ ബിസിനസ്സ് എക്സലൻസ് അവാർഡ് ജേതാവ് സറീന ഇസ്മായിൽ എന്നിവർക്ക് ഷാഫി പറമ്പിൽ ഉപഹാരം നൽകി. ഈ വർഷത്തെ ഏറ്റവും മികച്ച പ്രവർത്തകനുള്ള അവാർഡ് സുഷി കുമാറിനു കൈമാറി.
പരിപാടിയുടെ ഭാഗമായി കടത്തനാട്ടിന്റെ കലാപാരമ്പര്യത്തെ വിളിച്ചുണർത്തുന്ന വടക്കൻ പാട്ട്, നാട്ടിപ്പാട്ട് എന്നിവ വടകര എൻ ആർ ഐ യുടെ കലാകാരൻമാർ അവതരിപ്പിച്ചു .എൻ ആർ ഐ ഫോറത്തിലെ തന്നെ അംഗങ്ങൾ അഭിനയിച്ചു രാഖി രമണൻ സംവിധാനം ചെയ്ത നാടകം "കലയിൽ അല്പം കാര്യം" വേദിയിൽ അരങ്ങേറി . ശ്രീനാഥ് ശിവ ശങ്കരൻ, നീതു ഫൈസൽ എന്നിവർ നയിച്ച ഗാനമേളയും ഉണ്ടായിരുന്നു .
പ്രവാസോത്സവത്തിന്റെ ഭാഗമായി നടത്തിയ നർമ്മ പ്രസംഗ മത്സര വിജയികൾക്കും, കുട്ടികളുടെ ഫാഷൻ ഷോ വിജയികൾക്കും
സമ്മാനങ്ങൾ വിതരണം ചെയ്തു.
